#سرير_ماما! ما افتكرش ماما في مرة قالتلنا اطلعو بره اوضتي او انزلو من على سريري زي ما انا بعمل مع ولادي الي بشوف في عنيهم لمعه و شغف لما بينامو فيه و يتنططوا عليه،مع انهم عندهم سرايرهم بس هو احساسه دايما غير ... بالنسبه لهم هو أكتر مكان في العالم ممكن يحسوا فيه بالدفى و الأمان و الامبالاة و المكان الوحيد الي ممكن يجمعهم مع بعض و هيفضلوا يحسو فيه انهم أطفال مهما كبروا. و بفتكر و احنا صغيرين كنا بنحسه كبير قوي و ماتقدرش تجيب اخره و من كبره كنا بنعمله حلبه المصارعه الي بنقتل بعض فيها ضرب . اي مكان في الدنيا ممكن يضيق عليك الا هو ... فيه مغناطيس بيسحيبك انت و اخواتك عليه ، وفيه بركه بتخليه يوسع و يشيلكو كلكم ...و تخيل الكلام وسط مربع بيجمعكم كلكم بيكون ازاي! في الشتا كان البيت كله بيفضل نضيف الا السرير ده عشان كنا قاعدين نايمين واكلين شاربين حتى المذاكره عليه ... ممكن تعمل كل حاجه ان شالله تاكل البرتقال و تخبي قشرة بس ما تنزلش من عليه! لما تحب تختفي و تشبع نوم بتنام عليه، و لما تعيا بيعزلوك عن بقيه الي في البيت فيه .. غطاه أكبر من اي غطى، و دفاه بيجي من نفسنا و ضحكنا ولزقتنا في بعض و احنا قاعدين...، و فكرة انك تحرك نفسك بعد ما دفيت مكانك دي عايزه قلب ميت !! منتهى الأمان انك تقوم تستخبى فيه بليل و لو هاتنام تحت رجلين أبوك و امك و، كأنه فيه مناعة ضد الكوابيس و التفكير و القلق! بفتكر يوم المطر كان بابا يلمنا كلنا عليه، عشان مانخفش من صوت الرعد و يطمنا بحكاياته القديمه عن الشتا و يفرحنا بخبر مفيش مدرسه النهاردة : ) كل الأحداث المهمة و المناقشات العائليه حصلت عليه :الامتحانات و التنسيق و العريس و الفرح،حتى الحفيد بيتولد و يجي من المستشفى على السرير الكبير، بيرضع و يتشلقب و يتعرف على كل وشوش عيلته عليه! يمتاز سرير ماما بأن شكله ومكانه ما بيتغيرش كل ما تبصله تشوف ملامحك من ابتدائي لغايه ما أشتعل شعرك شيبا .. و لما تنام فيه بتشم ريحه مامتك و باباك في قطنه القديم الي كان كل فترة يتنجد بس عمره ما يترمي منقول

التفاؤل .. فن تصنعه النفوس الواثقة بقُدُراتها ، وبأنّ لاشيءَ مُستحيل